Okwikiriza


Ekyokubanza eki nakugondeze kukukaguza iwe arukusoma orupapura oli mukristayo? Omukristayo kimanyisa okusisana na Kristo. Iwe okora nkebi Kristo yakoraga mu bwomeezi bwawe? Yesu yagendagendaga naakora ebirungi, naakiza bona abaali nibagadisibwa Setani.

Ekigendererwa kyawe kiki mu bwomeezi? Kinu kyomuhendo muno habwokuba ekigenderrwa kyawe nikisobora kuba ekihikire, rundi ekyorukukora tikiri nikyo ekihikire, iwe nobworaba norora nikyo ekihikire habwawe. Ekigendererwa kyawe nukwo kutunga eka enungi rundi kugura motoka n’okwahura sente zawe mu Bank? Rundi nukwo kwekorra ebyo busubuzi, okuba omuntu owekitiinisa kandi omuranganwa; anyine obusobozi namaani ebirukukirrayo kimu omunsi munu? Nabwo bwakubaire butarumu.

Okutunga embabazi hali Ruhanga nikyo kirukukirrayo kimu kandi nikikira ebyo buguuda byona ebyomunsi, kandi tikirihwaho. Okwegesibwa okamarayo ebyo kwegesibwa byona, okamanya ebintu byona ebyo munsi tikirukugasa. Habwokuba ebiri munsi byona nibiija kuhwaho omukasumi kake muno; kandi busaho nakimu ekiriijukwa.

Obutubazaaho ebyo kweteekaniriza ebyo mumaiso nibyo biraha? Tibiri hamu ha Ruhanga? Nuwe anyine omutima gw’omukama omu mukono gwe, kandi aguhindura nagutwara hona harukugonza; nkebyambu bya maizi, Baibuli nukwo etugamba eti. Ahanga ebirungi kandi ahanga nebibi kandi anyine omuhanda gwe mu byona nkoku kyahandiikirwe. Busaho by’omumaiso munsi munu rundi mu egi erukugenda okwija hatali Ruhanga.

Omuntu omu yali naatekanizaa kukorra Ruhanga hanyuma y’okusasura amaka ge, baitu akasumi konyini akayali haihi kumaliriza kusasura amaka ge; omu ha baanabe yagwa mu nyanja eyekaba eri enyuma y’enjuye, amaizi gaamwita. Kyakubaire kirungi ebye byona kakuba yali amazire kubihayo hali Ruhanga hakubanza. Omusaija omu akaija mu rumu hanteerano zaitu, orwebagyo rumu, Omwoyo wa Ruhanga obu yali nayeta abantu okwegarukamu akahebwa omugisa okwikiriza okujunwa baitu yayanga. Ekiro ekyayongiireho, nkaba nindaba mbere baali nibaziika, ha saaha nka mukaaga ogw’emisana; obunarozire mu sanduuko nuho namusangire afiire. Okufa kukamwizira bwango, hanyuma y’okwanga Ruhanga. Bambi yali ayetekaniriize obwomeezi obwomumaiso.

Omu ruteerano orumu, nkesengereza abasaija babiri kwikiriza Yesu, nabo bayanga, hanyuma yakasumi kake muno nabo baafa, boona babiri. Kyakutwaire omwanya mukooto kakuba ndasoborra buli kintu ekyabaire omu kuheereza kwange, ebirukwoleka ngu busaho ebyomu maiso Ruhanga nambere atali. Busaho businge hali omubi, Baibuli nukwo etugambira.

Haroho iraka ery’okutiinisa omu matu g’abantu abaguuda eritaculeera. Habwokusaasibwa buli kiro, okutiina okufeerwa abagonzibwa, n’ebizibu ebindi omu bwomeezi bunu, obwenaku kandi obutarukugasa. Okwekamba muno kulengaho kubinga obunaku, rundi okuburwa sente, rundi okufeerwa ebintu ebitungwa, omu kutalibana n’okwekamba kwaitu; n’okukora kubi bagenzi baitu, mu bugobya n’okukoraganaokutahikire, tibuli bwomeezi nakake. Okuba omunyadiini oijwire obugobya (hypocrisy), nitwebiihabiiha buli kiro, nitukozesa amagezi gaitu itwenka, nitwegumya kihuta hali okwikiriza nokunihira okutali kwa mazima mu mitima yaitu. N’oteekereza obu nubwo bwomeezi? Okuheereza kwaitu hali bagenzi baitu kusemeriire kuba kw’omwoyo oguhikire, buli kasumi tuhurre nitujunanizibwa okuroleera bagenzi baitu, n’okubagonza.

Buli omu hali itwe nitujunaanizibwa omulingo nigwo gumu gwonka ogw’obuhereza bwaitu hali bagenzi baitu. Ruhanga akakitaho ati, ngu tuli balinzi ba bagenzi baitu. Kaini akaita Aberi, yayanga okuba mulinzi wa mugenziwe habwokwegomba okw’omubiri. Alisalibwa hagati y’ebiro bye kandi hakumalirra aliba mudomadoma. Ebyahandiikirwe nukwo bitugamba.

Mugenzi wange leka kutekerereza mu kutekerereza mu kutunga amaka amarungi, ebirukwangasana n’ebyomuhendo, ebyorora abantu batungire. Mugenzi leka okutekrereza mu by’ekitinisa okuranganwa n’ebiikaro ebikuru mu bwomeezi byonka; baitu etekerezeeho ebiikaro ebijanjabirwamu abarwaire b’emitwe, abarwaire bakakonko (TB), amarwarro, ebintu ebinyakurangwa mu makuru buli kiro; n’ebizibu ebyomunsi munu: Nkokurra okwengombe, okumanyisa akabi akagwire mu rubuga. Ebintu nk’ebi ebirukutiinisa obwomeezi obu nkoku tibuli nubwo oburukwetaagwa. Haroho obwomeezi obwa hairguru muno obunyakurumu okusemererwa, obusiinge, hamu n’okuhikirra. Okuhereza Ruhanga kireeta obusiinge (Baruumi 14:17). Iraka eryo erimu eryokwesengerza erimazire emyaka bikumi nebikumi niryeta baingi, nahati nirikyakweta iwe nanyowe, iraka kya Ruhanga mu buheereza nomu baana ba Ruhanga, niryesengereza abantu okuruga mu kuhangwa okwensi na gunu gujwa. Iraka linu erya Yesu likeyimukya lyonka omu businge oburabireho. Likesengereza abantu abo’mu biro bya Nuha hatakabaire okusandaara okwamaizi Likeesengereza mu biro bya Kristo akabi akakooto katagweriire Yerusalemu. Likabaza nabantu obu barwanaga nabahindi nibaserra hokwesereka ebizibu, ebyobwomeezi bunu omukubonabona kwabo okurabireho enyuma. Omuli ebi byona ebyahingwireho, nituhurra iraka eryomugaliraya, ayaikaraga wenka, ayaliomu bwomeezi bw’okubonabona okwingi habwawe nanyowe.

Nahati bunu iraka eri nirikyayesengereza, niriteereerra ensi enu ijwire okutatiina Ruhanga n’ebyobulemi ebitaikiriza okuha abantu obugabe okuramya Ruhanga (Socialism). Kankukaguze ekikaguzo kinu mugenzi wange; Habwawe tutahurra okwetwa kunu tukeegarukamu, habwawe tutateera amabega omuhanda ogwokutiina Ruhanga kwona nukwo mufooke abana abahansi?

Kristo akagamba ati, “Obusinge bunu obwokumalirra buli bw’omutwe mukooto, oburukuteekereza ebyahaiguru, obwokusiisa oburukugonza ebyabwo bwonka; kukira kugonza Ruhanga.” Paulo akagamba ati, “Banu nubo abantu empero y’ensi erukwizira. Baingi halinywe abandukutebeza binu mukamara okwokya ebiteekerezo byanyu n’ekyoma ekyomurro n’okuhurra timukyahurra, mumazire kwehayo hali omwoyo gwa Setani kukora byona ebyo kutatiina Ruhanga. Habwokuba buli kintu nikiija kuhwaho, kandi n’ensi enu eryokebwa omurro, Petero akagamba ati, “Tusemeriire kuba bantu bamulingo ki omu kuhikirra kwona? Nituserra kandi nitweteekaniriza ekiro kya Ruhanga. Petero onu ayahairwe ebisumuruzo by’obukama, akeemerra ha kiro kya pentekooti ekyokubanza Ekanisa obu yatandikirweho, kandi yakinguraho orwigi hali obusiinge bwona. Abantu 3000 ahonaaho bakataahamu.

Hali abantu 6 okuruga ha bukaikuru 7 abali munsi yaitu enu hati, baingaha abarukusiima ebigambo eby’Omwebembezi onu omukuru kandi omwangu? Iraka erya Kristo niryeyongera okuhulirwa okuruga mu kanwake, nirirangirirwa hali obusinge bwona? Okwetwa oku nikusaba bona okwegarukamu n’okubatizibwa mw’Ibara lya Yesu Kristo habwokuganyirwa ebibi nukwo mutunge ekisembo ky’Omwoyo Arukwera, habwokuba kyanyu nabaana banyu na hali bona Mukama Ruhanga waitu aba araayetaaga. Naiwe arukusoma binu oli mu kwetea kunu.

Baibuli negamba eti, “Abantu banu bakeyongera buli kiro bakeyongera buli kiro namaani, omukwegesibwa okwabakwenda.” Ijuka busaho muhanda gundi. Baitu mukajunwa habwembabazi obu mwaikiriiza, eki mutakyekorre inywenka, baitu kisembo kya Ruhanga; atakibahe habw’ebimwakozire, haleke kubaho arukwenyumiriza. Bakahurra ekigambo eki Petero obwakaba nateebeza bakiikiriza kandi okwikiriza okunyakwija habwokuhurra habw’okuhurra Ekigambo, kukolekwa omu bwomeezi bwabo, habwokuba bakaikiriza Ekigambo Petero ekiyabatebiize. Ahonaaho bakabatizibwa omu Mwoyo Arukwera, Omwoyo wa Ruhanga owobwomeezi obutahwaho; n’okujunwa, namaani ag’okujunwa, namaani ag’okuhumbuka. Okuraganiza Ruhanga okuyaraganiize Iburahimu mu Kristo, aka kuhikiriza ha kiro kya Pentekooti. Petero obuyagambire ati, “Kunu nuokuraganiza hali bona Mukama Ruhanga aba araayetaaga Nitugambirwa okwekamba nukwo tufoole okwetwa n’okukomwa kwaitu okwamazima. Tusobora tuta kumanya ngu kumanya ngu mazima tuli omu bakome abayakomere ira? Kitugamba ngu, “Tuli bakome ba Ruhanga abayakomere ira habwokwezibwa Omwoyo, nukwo tworobere Kristo kandi tumiisirwe esagama ye. Ruhanga akatuha ebintu byona, ebirukukwata ha bwomeezi n’okutiina Ruhanga, kandi akatweta hali ekitiinisa n’okuhikirra. Ebi nibyo yatuheeriiremu endagaano ze enkuru, kandi ez’okuhikiirra nukwo habwazo tusobole kutaburwa omu bubi obw’omunsi obuletwa okwegomba okubi mubagane habwaruhanga bwe. Omu rukarra rwa kataano, nikitugaokwekamba hali engeso enungi, kwongera ha kwikiriza kwaitu: okuhikirra n’okumanya twongereho okwetaaga hakwetaaga twongere okuguma; hakuguma twongereho okutiina Ruhanga. Ha kutiina Ruhanga mwongereho okugiirrana embabazi nk’aboruganda mwongereho engonzi. Kakuba muba n’ebirunge ebi byona bikeyongera okukanya, nibiija okubatambira obugara rundi okutaba b’omugaso, bibaleetere okumanyira kimu Mukama waitu Yesu Kristo. Weena atanyine ebirungi nk’ebi; aba mufu wa maiso; arora ebimuli haihi byonka, kandi aba ayeberwe nkoka yayogiibwe ebibi bye ebyaira.

Okugonza kugumisiriza kandi kugira embabazi, okugonza tikugira ihali nobu kwakuba okwenyumiriza, tikwehaisa nobu kwakuba okugira ekiniga; kugonza tikweserurra ebyakwo, tikubiihirwa, tikwikaza nzigu ha mutima tikusiima ebitahikire, baitu kusiima ebihikire. Okugonza kugira byona kugumisiriza byona. Yesu akatugamba ngu tulimanyira abakristayo habikorwa byabo. Tumanyire ngu tukaruga mu kufa twahika omu bwomeezi; habwokuba tugonza abagenzi baitu. Ruhanga kugonza. Ogu anyakwikara omu kugonza aikara mu Ruhanga.

Ebirungi ebinyakuzooka omu muntu anyakwine Omwoyo nibyo binu: okugonza, okusemererwa, obusinge, okugumisiriza, embabazi, oburungi, obwesigwa, obuculeezi n’okwetanga. Ebintu nkebi tibiina kiragiro ekirukubitanga. Ebintu binu nibigumya nkoku oli omu habakome kakuba biba nibisangibwa omuli iwe, nomubwomeezi bwawe.

Timumanyire abagobya nkoku bataligwetwa obukama bwa Ruhanga? Muleke kubiihwabiihwa, abanjuki, abaramya abacwezi, abasiihani abakuuhya, abasuma, ab’omukoijo, abatamiiziabajumi rundi abanyage, tibaligwetwa obukama bwa Ruhanga. Paulo akagamba ati, “Omuntu aleke kugobeza mugenziwe.”

Tebeza ekigambo, iwe otalitengeta, gumisiriza emihito, ohikirize kurungi obuhereza bwawe. Akasumi kaliija obubatalihurra, obu balyanga kuhurra amazima, baburanganire omu kwegomba kwabo, halibaho akasumi abantu obu balyanga okwegesa okwa mazima habwokugira amatu agarukubanulirra; balyesoroleza abegesa abarukubegesa ebibarukwenda. Kuba omuntu weena ayegesa enyegesa eyetali ya Ruhanga, wemyehembo, tamanyire kintu, nahabisa abantu. Omu nuho harugirra okurwana nokutabukatabuka mu bantu, nengesombi. Busaho nomu akora kurungi busaho nomu. Nketaama, boona bakahaba buli muntu omumuhandagwe wenka. Ruhanga akamuteekaho okutali kuhikirra kwaitu kwona. Akahutazibwa habw’ebibi byaitu, aketweka okubonesibwa kwaitu kwona, nukwo atuleetere obusinge. Ninkutebeza hali okwikiriza, okwahairwe ira hali abarukwera. Ikiriza Mukama Yesu Kristo kiro kinu, ojunwe. Mukama akuhe omugisa niyo saara ndukukusabira.

Bikahandiikwa George Leon Pike Sr.

Obutumwa bunu buteerwa bwokugabira busa. Obworaba noyetaaga obupapura obundi nka kanu handiika ha ndagirro eyerukwoleka hansi kandi otumanyise bwingaha obworukusobora kukozesa kurungi.

RUY9915T • RUNYORO/RUTOORO • THE FAITH

Okuhikirra Hali Ruhanga