Nroromelo


Okoha wopacherya miyo kinikhwelaaka wokohani ti’ wu: Khwino nyuwo mwaa Akristu? Ikhala Mkristu ti okhala oophwanaphwana ni Kristu. Khwino mukumini anyumunneera itchu seiyo Kristu eraiye mahiku othene vathi vano? Yowo aavinrevinre eeraka saphaama, apenushaka othene oohoshiwa ti musasareya.

Khwino munakhwelasha sheni wi mukhwaniherye sokhwela sanyu mukumini anyu wothene vathi vano? Ti etchu yaphaama vatokotoko wi mutchu asuwelashe wi yeyo anakhweliye wi eereke mukumini awe wothene, eri etchu yaphaama; akhweya etchu yeeyo munakhwelaanyu wi mweereke, tuwerya okhalatho etchu yonanara, nari yooneyaka ntoko etchu yaphaama. Khwino etchu yeyo munakhwelasha’ nyu wi mweereke, ti okhalano muhaku muhakhu wa elapo ya vathi vano? Okhala ni mihuwo, ipa soreera, athiyana anchipale oreera ithoi, ni itchu sinchiene, wi mukhale atchu oreelasha ni ovuwasha? Nthamwene aka, sokhwela sawi hiha iha, ti soweheryerya somoriha ikharari. Nyuwo mwawenrye okhala mutchu ooreelasha ni oovuwasha opwaha atchu akina othene vathi vano, oreela ni ovuwa wawi hiha iwo, waakhaleru watheruene ni ohoosha murima. Mwene Solomoni a m’ Biblia, aakhalano itchu sothe sene iha, nyenya aalocha wi sothe sene iha, sari satheruene.

Etchu yopwahasha oreela ti waakhela ikharari sa Muluku, muhakhu wohimala okhala-wokhala. Nari mutchu ari oohuseryasha eskola, aphiyerya vasulu va miruku, anawuwela itchu sinchiene sa okumi wa vathi vano, elatho ti etheruene; vawi itchu sothe sene sa vathi vano sinarwa sitothowa ni oviha otokotoko, nave havovo anaawerye wupuwelatho iho.

Vale nnulumaahu sawiryeheryerya sa muhoolo, khwino muhoolo sheni? Ori wowi? Manki muhoolo muneene tahi uluku pahi? Ti Yoworu anaphareela murima wa mwene m’matain mwawe, anarukunusha mummo anakhweleliye muneene ntoko mihiche ya mahi. Biblia tananleela masu yaala. Ti Yowo anapachusha saphaama: ti Yowotho anapachusha sonanara, analamulela sothe sene iho. Biblia tananleela masu yaala.

Muhoolo hamwimo elapo ya vathi vano, nari elapo enaarwe eyo, vohikhalavo Muluku. Kaalocha ni mukukhuka a egreja nihiku nikinako sa muhoolo mwawe. Yowo akhwela wi apacherye omurumeela Muluke amala othuma empa awe; nyenya vakhiviru ni elukuluku yeyo akhweliye wi amalihe othuma empa eyo, mmoha a anamwane awe, aamorela m’mahini vahhiviru ni empa yeyo, akhwela mummo. Aari mutchu ole aveleele itchu sawe sothe sene wa Muluku vopacherya vavale, ela heyawoneye hoe.

Mulopwana mukinako aarwa o nthukumano wiwo kalaleyeryakawo Masu a Muluku, ohiyu; nyenya vavo Munepa Waweela wa Muluku awitchaniye atchu wi etcharuwe sotcheka saya, mulopwana owo aavahiwa ekari yawi aakhele ovulushiwa, nyenya haakhwenle hoe. Oshishelo awe, othana, kaaya ompa wiwo waari murutchu wa mulopwana yole, koona ethoi awe ya mutchu ookhwa eri mu kaishya. Okhwa waamurweela mwawaakuva vale akhochiliye Muluku. Ahoocheela wiryeheryela samuhoolo mwawe.

Munthukumano nikinatho, kaaleketcha atehu eeli; nave yawo yaakhoocha. Vohilekela othene awo yaakhwa. Kinova omala nipuro norepelavo masu wi kiloche sa itchu seiyo sereiye m’mutekoni aka wolaeyerya Masu a Muluku, seiyo sinoniha wi muhoolo hamwimomo vohikhala Muluku.

Biblia ananleela hiyo wi hawiwo murechele wa atchu oonanara murima. Mokhala nsu nawopiha m’ waruni mwa atchu oonanara okhala wokhala. Okhala ni okumi wawoova okhwa mahiku othene; woova irecha, akhwiri, mitume, anepa, ohaawa, ni itchu sothe sene sohoosha vathi vano, tahi okumi waphaama hoe. Weehererya ophwanya alip a ihako, atchu a nyaka, a mitume, alipa oloola ipa ni imacha sahu, ni itchu sikina sinchiene, vamoha ni ohoosha atchu akhwihu vawaphariha muteko siyoene, akhweya owaakha muhakhu aya mwawawoko, tahi okumi waphaama. Okumi wolapa Muluku mowoka, wiwoka mekhihu mahiku othene mu sawupuwela sawihu mekhihu, wititeleliha mekhihu sa nroromelo ni oweheryerya wiwo ohinakhalaru vathi va murima ahu. Manki yola muneera wi ti okumi waphaama?

Okhwela wahu otokotoko orumeela atchu akhwihu onaphwanela okhala weparipari; okhale worweela m’puwani mwa murima ahu; nsuweleke mahiku othene wi nokhala ni muteko mutokotokosha wokhapelela munnani ahu. Othene ninnahaamela va muteko wa mutchu mukina wa miloko yohiyanahiyana. Muluku arehenrye wi okhala wawi hiha; ntakhara na ela, othene hiyo nri alip alipelela annani ahu. Kaini aamwipha Abele, anakhoocha wi yowo haari mulipa olipelela munnani awe, nthakhara a minkhela awe yowoka. Muluku anarwa amvaha mutchu phatamari awe ntoko na miteko awe. Yowo anireeliha mekhiye mowoka, anarwa athikilwa mahiku awe ehinakhwanihiwe, nave vokutchula vaya anarwa akhala mutchu olosowa. Sorempwa sinanleela iha.

Muhupuweleke sa itchu sa elapo ya vathiru; oreela, ipa soreera, mihuwo, solya ni sinchiene. Muhupuweleke sa othamaliwa ni atchuru, ovuwa, ni mapuro a nchichimiho yawo atchu enakhalayano. Munaphwanelatho wupuwela sa marecha ohiyanahiyana, ipa sokhapelelamo alipa a yowolo, alipa aanepa, ni atchu anchipale awicheliwa irecha sohiyana-hiyana, ni masooso manchiene yawo enahoosha atchu mahiku othene. Yawo ekhanleno a radio, ni yawo enaalakhanya ipaphelo solocha sa itchu seiyo sineereya vathi vano nihiku nnihiku, enniwa itchu sothe sene iha. Miyo kinoonaaka itchu sothe sene iha, kinnasuwela wi okumi honakhala wawi hiha hoe. Wokhala nipuro nikina nawirium wiwo ori okumi wotheya, wa murechele, ni ekhaikhai. Omurumeela Muluka onnarwiiha okumi yola.

Nsu nimoharu nenlo nawitchanne atchu khalai tinenlotho nnawitchana weyo ni miyo olelo vava. Ti nsu na Muluku, Yowo analocha ovinyerya mwa orumeela wa anamwane awe a Muluku, yawo enaleketcha atchu opacherya okhala wawe welap ya vathi vano.

Nsu na Yesu Kristu nakhuwela mahiku yale yowo aariye vathi vano. Nsu nenlo naaleketcha atchu m’mahiku a Nowa atchu ahinaakuve otoloshiwa. Nsu nenlo naaleketcha atchu m’mahiku a Yesu Kristu, Yerusalemu ahinaakuve omwareya. Nsu’nlo naalocha wa atchu yawo yeecheecha yavyaka elapo yokhalamo mahiku akhalait Nsu menla, norweela mahiku akhalai, ninniweya ntoko namalwe okhuma wa mulopwana oonyemuliwa ole a o Galileya Yole aari ni ikumi wa masoose ntakhara na weyo ni miyo. Olelo vava Nsu nenla ninniweya nleketchaka vatokotoko atchu yawo enasiveliwa itchu sa okumi wa vathi vano. Vano kokoheni, nthamwene aka. “Nthowa tani wi hannakhapelela witchana uwu wawi ntcharuwe, nrukunuwe ohiya okumi ahu wosiveliwa itchu sa okumi ola, niwi niphitaaneno atchu awiyeviha”?

Kristu salocha wi atchu a m’mahiku okutchula enaraw ekhala awithamala, awirumiha, ohaatanyiheya, awisivela mkhataya, ohikhala omusivela Muluku. Paulo aalocha wi ala ti atchu yawo makutchuwelo a elapo ya vathi vano ephiyalaya va yawo. Anchipale a yenyu munaalakhanya masu ala, yawupusherya ya murima anyu yaahisiwa ntoko ni muthipo wa moro, nave hamunasuwela wi yeyo muneranyu ti yonanara, vawi mohiveleela mekhinu wa munepa we Satana, wi mwereke itchu sothe sene sonanara.

Vawoona wi itchu sothe sene sinarwa sukuluwa, niwi elapo ya vathi enerwa yeyeliwa, Petro aalocha ii, “Nyuwo munaphwanela okhala atchu awi hai nki, m’makhalelo aweela ni m’mathamalelo, muweheryeryaka ni wakuvela orwa waya wa nihiku na Muluku”.

Petro yola, ti yowo annyiwe sohulela sa Omwene wa Muluku, aaheemela, nihiku na Pentekoste, Egreja ya Muluku yapachenryaya, ahulela nsele na Omwene wa Muluku wa tchua a miloko yothene. Atchu okhwanela ntoko masana makhumi mararu, yaavolowamo nihiku nenle.

Mwa atchu oohaalakhanyeya yawo eri velaponi ya vathi olelo vava, ti atchu ahai yawo enakhapelala masu yala a mutchu mutokotoko ola, vava Nsu na Kristu nniweyaaya ntoko namalwe orweela mu iyano Sawe, nyaaka wa atchu a miloko yothene?

Atchu ennitchaniwa wi etcharuwe, wi ebatisiwe mu Nsina na Yesu Kristu vokhurumuweliwa wa sotcheka saya, wi yaakhele Munepa Waweela, vawi nlakana nri wa yawo, ni wa anamwane aya, ni wa othene yawo Apwiya Muluku ahu, aniriye awitchane. Khwino nyuwo mwaa mmoha a yala? Biblia ananleela hiyo wi atchu yala yamwikhalelaru muhusiha wa arummwa. Suwelani wi heyaro ephiro ekina hoe.

Vawi mwa ovulushiwa ni ikharari sawereya mwa nroromelo, nave ela tahi yorweela o mutekoni wi mutchu mukina ahithamale, eri yamahala a Muluku. Atchu ale yaahiwa masu yale Petro alaleyeryaiye wa yawo, eroromela masu yawo; nave nroromelo nenlo nnarweela mwa wiwa Masu a Muluku, nahoneya mukumini mwaya, orweela mwa okhapelela Masu a Muluku yawo Petro alonchiye. Vavo yahaakhela elukuluku yeyo obatiso wa Munepa Waweela wa Muluku wa okumi wohimala, ovulushiwa ni ikuru sa ovinyatho wukhwani.

Nlakano nenlo Muluku aalakhanniye ni Abrahamu, mwa Kristu, aakhwanihela nihiku na Pentekoste, vale Petro alochiliye wi, “Nle nlakano wa yawo othene Apwiya Muluku aniriye awitchane”.

Ninnaleeliwa wi nachereye mvai, otikitherya witchaniwa ni othanliwa wahu. Nnaasuwele hai wi hiyo nri mwa yayo Muluku aasuwelenliye khuluvi. I Petro 1:2 annanleela wi nri oethanliwa, ntoko na osuwela khuluvi wa Muluku Atithi, ni weliha wa Munepa Waweela, waseeriha wiwelela, ni omisa wa nikhami na Yesu Kristu.

Muluku oonivaha hiyo itchu sothe sene sa vokumini ni othamalelu muusuwelasha wa Yowo aanitchanne hiyo ni nchichimiho ni epewe awe ya Yowo mkhatiye. Mwa iha taanivahiliye malakano aesisapo aya ni matokotokosha; wi mwa iha mukhale awaataanano omuluku awe, m’vuluwale o’yucheni yeyo eri velaponi ya vathi m’minkhela.

Mu verso 5, nnaleeliwa wi, nikhale ni mvai waacheryerya epewe va nroromelo nahu, nave vepewe, osuwelasha; nave vosuwelasha, wiihiiha; nave vawiihiiha, evilelelo; nave vevilelelo, mathamalelo; nave vamathamalelo, okhovelana womunna; nave vokhovelelana womunna, osivela. Ntakhara iha sakhala mwa nyuwo, nave saacha sinarwa serano wi muhikhale ooyere nari oohikkalano sawima vosuwelasha wa Apwiya ahu Yesu Kristu. Ntakhara yowo ohinono iha ori eevasi, oohisuwela, oochiwala ovasiwa wawe woriha sonanara sawe sakhalai.

Osivela onnikhalelaru okhala wokhala, ori wepelwe; honakakamela, honasuwela withamala, honirumiha, honeera sohiphwanelala, honatchara sa mwanene mekhaya, honasarasareya murima, honupuwelela sonanara; honahakalalela owoka, nyenya onnahakalalela eparipari; onnuuhela itchu sothene, onnaroromela itchu sothene, onnaweheryerya itchu sothene, onnavilela itchu sothene.

Yesu aalocha wi nnarwanimusuwela Mkristu ni sawima sawe. Ninnasuwela wi novinyawo wukhwani nivolowa mukumini, ntakhara ninnasivela annani. Muluku ti osivela, nave yowo oniitchaala musivela, oniitchaala mwa Muluku.

Nyenya yawima ya Munepa ti osivela, otheya, murechele, oleva, ikharari, epewe, nroromelo, omaala, wiihiiha; vokhocha iha nlamulo hanavovo. Itchu iha sinnoniherya wi nyuwo mwa mmoha a yawo ari othanliwa, itchu iha saawoneyaka mukumini anyu.

Akhweya hamunasuwela wi oohikhala ekhaikhai herwa-yakhela omwene wa Muluku? Muhihuwelihiwe; achapaheya, nari oothamala sophwaniherya, nari oocheetcheya ni sonanara, nari awipahula ni alopwana, nari alipawiya, nari ookhalela nrima, nari oowurasha, nari oonyemula, nari awaakha, herweevolowa omwene wa Muluku. Paulo aalocha wi nihiwokaneke mukina ni mukhwawe.

Laleyera Masu! Erano velukuluku aya; vahinakhala elukuluku aya; vaanya, samela, lopola, ni oleva wothene ni ohusiha. Ntakhara enarwaephiya mahiku vavo eniriraya ehemyeryerye ohusiha woreeliha; nyenya voonceeniwa o’waruni enarwayithukumanyerya alipa-ohusiha ntoko mwa minkhela ya yawo mekhaya: nave enarwa-yikuphyiha mwaiini verparipari, nave enarwaehapuwa otchara ithale satherutheru.

Mutchu ahusiha sikina, akhweya mahusiho makina yawo ahiri ntoko mwa mathamalelo, yowo ohirumiha, ahisuwelakaru, nyenya connaaluwela murima sokoha ni sovaanyihana sa masu, wiwo onarweela owana, ni manyiheryo onanara. Havovo mmoha aweera saphama, ahe, havovo munoha tchiri. Oothene yaahuwela ntoko epuchepuche, nave mutchu mukina anorukunuwela ephiro yawe mekhiye; nave Muluku aahiyathi maraphwa a hiyo othene va Yowo. Yowo aavulalihiwa ntakhara a maraphwa ahu; olakiwa wonikusherya hiyo murechele wahiyathiwa va Yowo. kinlocha sa nroromelo, nenlo navahiwe omoha wa alipa-aweela murima; Roromelani Apwiya Yesu Kristu, olelo vav wi muvulushiwe. Kinnovekelelani wi Muluku oreeliheni.

Mulipa-oorepa: George Leon Pike Sr.

Mitchaka iha sirempwe wi sivahiweke siyoene wa atchu. Yawo enakhwela sinchiene erepele wa nipuro nri vathiva, eloche waacha waya wa ipaphelo enasuwelaaya wi eneere owerya ovaha atchu akina.

ELO9915T • ELOMWE • THE FAITH

Weeliheliwa Muluku