Icitetekelo


Icintu ca ntanshi ndefwaya ukwipusha iwe weulebelenga aka katabo nici, bushe uli mwina Kristu? Ubwina Kristu cipilibula ukuba nga-Kristu. Bushe ulacita ifintu mu bumi fintu Kristu acitile mu bumi bwakwe pe sonde? Aile alecita ifisuma, ukundapa bonse abalecushiwa na ciwa.

Cinshi ufwaya nangu ukukabila mu bumi bobe? Cikankala sana ukuti amapange yobe yantu yalungama, nangu icintu ico ulecita tacilungeme te mulandu fintu cingamoneka ubusuma. Bushe ukukabila kobe kukwata ing’anda" limbi motoka ne ndalama ku banki" nangu bushe ukukabila kobe kukwata amakwebo, ukucindikwa, ukwishibikwa, nangu amaka ya mu calo? We munandi ici cimonwa ca bupina sana. Nga cakuti wali uwanonkesha, uwaishibikwa sana, kabili umuntu uwakwatisha sana amaka mu calo, kuti caba fye icafye kabili no kucusha umupashi. Imfumu Solomoni iya mu Baibele yalikwete ifi fintu fyonse, lelo atile fyonse fyafye.

Ukupoka uluse kuli Lesa e cuma fye icacine icishipwa. Ukusambilila ukufika na ku mpela ya bulungami pa fintu fyonse mu bumi tacili nangu cimo, pantu ifintu fyonse ifyaba muno calo fili no konaika pa kashita akanono, kabili takwakabe ukwibukisha pali fyonse.

Ilyo tulanda pakuiteyanya kwa ku ntanshi, bushe intanshi ilikwi? Bushe tayaba na Lesa? Aliikatilila umutima wa mfumu mu kuboko kwakwe, kabili alaupilibula konse kuntu alefwaya, nga kamana ka menshi, Baibele ilatweba. Alalenga icisuma, kabili alalenga ne cibi, kabili akwata inshila yakwe muli fyonse fibili, nga fintu caba mu malembo.

Takwaba intanshi muli cino calo nangu icikesa, ukwabula Lesa. Inshita imo nalilandile na kashimikila palwa ntanshi yakwe. Alepinga ukubombela Lesa lilya linefye apwisha ukulipila ing’anda yakwe" lelo, ilya ine fye nshita apwishishe ukulipila ishasheleko, umwana wakwe umo aliibile muli bemba ku numa ya ng’anda yakwe. Apela ifyakwe fyonse kuli Lesa pa kutendeka nga caliweme.

Inshita imo umuntu aliishile mu kulongana nefwe mu nshita ya bushiku, kabili lintu Umupashi wakwa Lesa waleleta abantu mu kulapila, alipelwe ishuko lya kupokelela ipusukilo, lelo alikene. Ubushiku bwakonkelepo mu nshita ya cungulo, mupepi na pa ng’anda ya malilo, nalolekeshe pa menso pakwe apafwa mu mbokoshi. Imfwa yalyumine bwangu bwangu pa numa ya kukana Lesa. Taali uwaiteyanya pa lwa ku ntanshi.

Mu kulongana kumbi, nalikonkomeshe abaume babili, kabili balikene. Panshita inono pa numa, kabili bonse baliifwa. Kuti casenda inshita ukulanda pa fintu ifya citika mu kushimikila kwandi ukushininkisha ukutila, takwaba intanshi ukwabula Lesa.

Takuli umutende ku mbifi Baibele ilatweba. Kwaliba icibulumo icabipa mu matwi ya ba cuma ico cishipwa. Ukuponenwa lyonse no mwenso wakulufya abatemwikwa, amalwele, ukupena, na macushi mu nshila ya bumi, kwikala kumo ukwa bupina. Ukulwisha kabili no kwesha, ukwesha ukusungilila ulupiya, nangu ukulufya ifipe fyesu fintu tubombela na maka sana, kabili no kucusha umuntu munensu ne misango yabipa, te bumi. Ubumi bwa bukapepa ubwa bu bumbi munda, ukuibepa fwebene lyonse, mu matontonkanyo ya masambililo, ukuipela bucishinka fwebene ubwa citetekelo kabili ne subilo ilishimoneka mukati ka myeo yesu" bushe kuti mwalanda ukuti ubu bumi?

Amapange yesu aya milimo ya ku muntu munensu yalingile ukuba ayapwililika, kabili yalingile ukuba ayasuma, lyonse ukumfwa pa mulimo twapelwa ukuba nga kasunga wakwa munyina. Onse muli ifwe tulasungwa pa mulimo umo nangu umbi ukufuma ku muntu munensu. Lesa efyo acibika muli uyu musango" e ico tuli bakasunga ba bamunyina.

Kaini alipeye Abelo, kabili alikene ukuba kasunga wakwa munyina pa mulandu wa kukabila kwakwe ukubi. Lesa akalambula umuntu mu mulinganya uyo.

Mwitontonkanya fye pa mayanda ayasuma, ifyakufwala, kabili no kukwata imyotoka mumona ku bantu. Mwitontonkanya pa mucinshi, ukwishibikwa kabili no bwikalo ubwa mu bumi epela" lelo tontonkanyeni pa fikulwa fya bapena, ifikulwa fya T.B., ifipatala, ilyashi ilibilwa lyonse mu mapepala kabili na malanda yonse aya mu bumi, ngo kulila kwa myotoka sha katenga malilo mu musumba ukalamba. Ifi fintu ifitinya, no kubikapo no mwenso kabili no kukalipwa, filanjeba ukutila teifi fyeka ifyaba mu bumi. Kwaliba incende ya pa mulu uko ukwaba umwela wa nsansa, umutende kabili no bulungami. Ukubombela Lesa kulaleta uyu mwela.

Ishiwi limo ilipapata ilyo ilyaita mu nkulo ne nkulo licili lileita imwe na ine. Lishiwi lyakwa Lesa, ukupitila mu kushimikila kabili mu bana bakwa Lesa, ukupapata ku bantu ukufuma fye lintu icalo catendeke.

Ishiwi lyakwa Lesa lyaleisansabika mu nkulo isha ku numa. Lyalepapata mu nshiku shakwa Noah, lintu ukonaulwa takulafika. Lyalepapata mu bushiku bwakwa Kristu lintu amacushi ya kalamba tayalaponena Yerusalem. Lyalelanda ku bantu lintu baleenda mu mabala ya ngano, ukuma bansamya, ukufwaya icifimbo ukufuma ku mabimbi ya bumi mu malendo ya kucimfya ili lyashi ilya mu myaka ya kale. Ukufuma ku kale kulefuma iciunda icatekanya ica mashiwi ukufuma ku mwina Galileo, uwaikele ubumi bwa bucushi pa mulandu wa imwe na ine. Ilelo lilya line ishiwi lilepepeta ukukonkomesha ku kalamba ku calo ca cikomo (socialism). Ndekwipusha ili lipusho we munandi: ninshi tushumfwila ubu bwite ukulapila, ukufutatuka ukufuma ku bumi bwesu bwa fintu fya mu calo, kabili no kuibika ku bantu abo abaicefya?

Kristu atile ino nkulo ikaba iya bucintomfwa, iyatumikwa, amataki, kabili abaitemwa, kabili abatemwa ukwangala ukucila ukutemwa Lesa. Paulo atile aba bantu ebo impela ifikile. Abengi imwe, uku ndelandila, na mushika ba kampingu benu kale, kabili mwalileka no kumfwa, ilyo mwaipele mwe bene ku mupashi wakwa satana, ukubomba umulimo onse uubi.

E ico apo ifi fyonse fili no kusunguluka ifi, kabili ne milimo yabamo ikapya, Petro alipwishe, Bushe tulingile ukuba abantu ba musango shani, mu milandile yonse iya mushilo, imwe mufwile ukuba abenda mu mibele ya mushilo, abalolela no kufikilisha ukwisa kwa bushiku bwakwa Lesa?

Uyu wine Petro e wapelwe imfungulo sha mu bufumu, aimine, pa bushiku bwa Pentecost, ilyo ulukuta lwatendeke, kabili no kwisula umwinshi ku nkulo shonse. Balilingile amakana yatatu lilya line.

Pa bantu imintapendwa ine abaikala pano calo cesu ilelo, ni banga bali no kukutika ku mashiwi ya ntungulushi iyi ikalamba iyaicefya, ilyo ishiwi lyakwa Kristu lileumfwika ukupitila pa milomo yakwe, ukulilila ku nkulo shonse?

Ubu bwite kulapila, no kubatishiwa mwi Shina lyakwa Yesu Kristu ku kulekelelwa imembu, ukuti mupokelele icabupe Umupashi wa Mushilo, pantu icalailwe cili kuli imwe na ku bana benu, kabili kuli bonse abakutali, kuli bonse abo Lesa wesu aketa bese kuli wene. Bushe epo waba pali ubu bwite?

Baibele itila aba bantu balitwalilile, mu kusambilisha kwa batumwa. Ibukisha takwaba inshila imbi.

Pantu ni mukusenamina mwapusukila, pa kutetekela" kabili te cintu icafuma kuli imwe, tacafuma mu milimo, pakuti umuntu enga takisha, lelo ca bupe cakwa Lesa. Baliumfwile Icebo lintu Petro aleshimikila" bali tetekele Cebo" kabili icitetekelo ciisa mu kumfwe Cebo cakwa Lesa. Calilangwa mu bumi bwabo pa mulimo wa cumfwila ku Cebo cakwa Leso ico Petro asosele. Balipokelele lilya line ulubatisho lwa Mupashi wa Mushilo, Umupashi wawka Lesa uwa mweo wa muyayaya, ipusukilo na maka ayakubuka ku bafwa.

Ubulayo buntu Lesa apele kuli Abraham, muli Kristu alifikilishe pa bushiku bwa Pentecost, Ilyo Petro atile, “Ubu e bulayo kuli bonse abo Lesa wesu aketa.”

Twalyebwa ukwikatisha ubwite bwesu no kusalwa kwesu. Kuti twaishiba shani ukuti twali pa kati kabalya abali mu kwishibila kabela ukwakwa Lesa? 1 Petro 1:2 aletweba ukuti twaba abasalilwa umwabela ukwishibila kabela kwakwa Lesa Shifwe, mu kushisha kwa Mupashi, ukuba abacumfwila abakaninwa umulopa wakwa Yesu Kristu.

Lesa alit upele fintu fyonse fitwala ku mweo kabili na bu Lesa, kabili alitwita mu bukata bwakwe no bulumba bwakwe" muli ifyo atufumpile ifilayo fikankala kabili ifyakulisha, ukuti muli ifyo emo mufulumukile ukufuma mu kubola kwa mu lunkumbwa ululi pano isonde.

Muli 2 Petro 1:5 ciletweba pali ici cine ku kulundako ukucincila konse, ku citetekelo cenu lundeniko ubulumba, na ku bulumba lundeniko ukwishiba, na kukwishiba lundeniko ukuiteka, na kukuiteka lundeniko ukushipikisha, na kukushipikisha lundeniko bukapepa, na kuli bukapepa lundeniko ukutemwa aba bwananyina, na kukutemwa aba bwananyina lundeniko ukutemwa. Pantu ifi fintu nga fyaba muli imwe no kufu lisha kuti fyamucita abapilikita, kabili abatwala ifisabo mukwishiba Shikulwifwe Yesu Kristu. Pantu uwabulwa ifi fintu ni mpofu, alifilwa ukumona apatali, nalaba ukusangululwa kwakwe ku membu shakwe ishakale.

Ukutemwa kulatekanya, ukucita icongwe, takwikatwa kalumwa, takucita mataki, takutumikwa, takucita icishiyene, takuifwaila ifyakuko, takufishiwa ku mutima, takulinga cabipa" takusekelela pacishilungeme, lelo kusekelela pamo ne cine" kushipikisha fyonse, kutetekela fyonse, kushishimisha fyonse.

Yesu atile kuti twaishiba umwina Kristu ku fisabo atwala. Twalishiba ukuti twali mu mfwa ukwisa mu mweo pantu twalitemwa ba munyina. Lesa citemwiko. Uyo uwaikala mu citemwiko aikala muli Lesa.

Ifisabo fya Mupashi nifi, ukutemwa, ukusekelela, umutende, ukutekanya, icongwe, ubusuma, icishinka, ukunakila, ukuteka umutima" takuli imbela ya kupinkana na bacite fi. Ifi fintu fileshininkisha ukuti uli umo uwaitwa kabili uwasalwa nga filemoneka mu bumi bobe.

Bushe tamwaishiba ukuti abashalungama tabakapyane ubufumu bwakwa Lesa? Mwitumpikwa, nangu ba bulalelale, nangu abapepa utulubi, nangu bacende, nangu bansele, nangu ababembuka na baume banabo, nangu bapupu, nangu balwinso, nangu fipondo, tabakapyane ubufumu bwakwa Lesa. Paulo atile mwitanana, kano pa kusuminishanya ukwikala fye akashita.

Bile Cebo! Cincila inshita iiyene, ebaula, kalipila, konkomesha, mu kutekanya konse na mukusambilisha" pantu ikese nshita yintu bakakana ukusambilishiwa isambilisho lituntulu, lelo bakailonganika ba kasambilisha umwabela ulunkumbwa lwabo lwine, pa kuba abapepula amatwi" kabili abakapusula amatwi yabo ku cine, no kwalukila ku milumbe.

Ngo muntu uuli onse asambilisha ifyapusana nefi, nangu asambilisha isambilisho limbi ilyalingana na bukapepa, nishi atumikwa, taishiba nangu cimo, lelo asabaila fye ifya fikansa no lubuli lwa fyebo, muli ifyo mufuma akalumwa, kabili no kutunganya ifya bubifi. Takuli uwalungama" nangu umo. Bonse balubile nge mpanga, twayalukile umuntu no muntu ku nshila shakwe, nao Yehoba aponeshe pali wene amampulu yafwe bonse. Kabili afwantilwe pa mampulu yesu" akalimunwa ka kutumwenamo ubutuntulu kwaponene pali wene. Ndelanda pa citetekelo, icapelwe limo na limo ku bashila. Tetekela muli Shikulu Yesu Kristu lelo, Kabili upusuke.

Lesa amupale epepo lyandi.

Rev. George Leon Pike Sr.

Founder and first President of Jesus Christ’s Eternal Kingdom of Abundant Life, Inc.

Umushilo Kuli Lesa

Iyi Mbila yalembwa na George Leon Pike ukuti ilepelwa ukwabula ukushitisha. Nga Mulefwaya utubuku na tumbi, lembeni kuli iyi adress mwisambe, ukulondolola impendwa yintu mwingabomfya, mu musango ulingile.

BEM9915T • BEMBA • THE FAITH